lankadeepa 5/5/2014
හාමුදුරුවන්ගේ සංගමයත් ගාල්ලේ වැඩ නෑ
2014 මැයි මස 05 09:09:32 | වේරගොඩගේ සජිව විජේවීර
හෙද වර්ජනය අද සිට අවසන් කරන බව රාජ්‍ය සේවා එක්සත් හෙද සංගමයේ සභාපති මුරුත්තෙට්ටුවේ ආනන්ද හිමියන් පෙරදින පැවසුවත් වර්ජනය දිගටම ගෙන යන බව රාජ්‍ය සේවා එක්සත් හෙද සංගමයේ ජ්‍යේෂ්ඨ උප සභාපති හා කරාපිටි ශාඛාවේ සභාපති දකුණු පලාත් සංවිධාන ලේකම් ඩී.බොරලැස්ස කියයි.
රජයේ වෛද්‍ය නිලධාරීන්ගේ සංගමය හෙද සේවය සම්බන්ධයෙන් කරන ලද ප්‍රකාශ ඉල්ලා අස්කැරගන්නා තුරු අඛණ්ඩ වැඩවර්ජනයක යෙදීමට තීරණය කැර ඇතැයි බොරලැස්ස මහතා පවසයි. ඒ අනුව සියළුම රෝහල්හි දැඩි සත්කාර ඒකක, හදිසි ශල්‍යකර්ම, ළමා ඒකක යන අත්‍යාවශ්‍ය සේවාවන් සඳහා හෙද නිලධාරී නිලධාරිනියන් සිය සේවා ලබා දුන්න ද ඔවුන් අත්සන් කිරීමෙන් වැළකී සාමාන්‍ය ඇඳුමින් සැරසී එසේ කරන බව ද හෙතෙම කියා සිටියේය. හෙදියන් විසින් කළ යුතු කාර්යයන් සඳහා කණිෂ්ඨ කාර්ය මණ්ඩල යොදා ගන්නේ නම් අත්‍යාවශ්‍ය සේවාවලින් ඉවත්වීමට සිදුවන බව බොරලැස්ස මහතා වැඩිදුරටත් කියා සිටියේය. කරාපිටිය රෝහලේ හෙද හෙදියන් 1400 කින් අද අත්‍යාවශ්‍ය සේවයේ යෙදී සිටින්නේ 65 දෙනකු පමණක් බව රෝහල් ආරංචිමාර්ග පවසයි.
No comments:
Post a Comment